मञ्चको मुख्य कार्यभारहरू

१. जातिवादी भइने भ्रमः किरात राई कर्मचारी मञ्चमा संगठित भई क्रियाशील हुँदा संकीर्ण जातिवादी भइन्छ, आफ्ना सहकर्मी र सुपरिवेक्षकहरूका अगाडि गलत र फरक धारको भइन्छ, ट्रेड युनियनको विकृतिको भारी बोक्नु पर्दछ कि भन्ने भ्रमहरू केही राई तथा गैर राई कर्मचारीहरूमा रहेको पाइन्छ । यसलाई हामीले आमूलरुपमा तोड्न जरुरी छ । किरात राई कर्मचारी मञ्च कुनै जातिलाई विभेद र अन्याय गर्ने वा गराउने संगठन होइन । यसले कुनै जाति विशेषको विरोध र आलोचना पनि गर्दैन । यो सरकार वा सामूहिक सौदाबाजी गर्ने ट्रेड युनियन वा सोको न पक्षपाति हो न त विरोधी नै । यसले त केवल सामुदायिक सशक्तीकरण, जागरण, उत्थान एवम् सामाजिक कल्याण र सेवामा योगदान गर्दछ र त्यसप्रति संगठितरुपमा क्रियाशील रहन्छ ।

२. मञ्चमा लाग्दा वृत्ति विकासमा पछि परिने भ्रमः किरात राई कर्मचारी मञ्चमा संगठित भइ बैठक, कार्यक्रमहरूमा भाग लिँदा वा कुनै अभियान सञ्चालनमा क्रियाशील हुँदा व्यर्थ समयको बर्बादी हुन्छ, वृत्ति विकासमा लगाउनु पर्ने महत्त्वपूर्ण समय लगाउन पाइँदैन र स्रोतसाधनको दुरुपयोग भइ वृत्ति विकासमा पछि परिन्छ कि ? भन्ने केही किरात राई कर्मचारीहरूको मनमा भ्रमले डेरा जमाएको छ । जुन भ्रमलाई चिर्न आवश्यक देखिन्छ । वास्तवमा कुनै पनि संगठनमा क्रियाशील हुँदा समूहमा काम गर्ने बानीको विकास हुनुका साथै नेतृत्व विकास पनि हुन्छ । कुनै पनि समस्याको समाधानमा सहभागितामूलक अवधारणा अपनाउने अभ्यास हुनुका साथै व्यवस्थापकीय सीपको विकास हुन्छ । अझ किरात राई कर्मचारी मञ्चमा संगठित हुँदा त किरात राई यायोक्खा र यसका विभिन्न भातृ संस्थाहरू तथा भाषिक संस्थाहरूसँग जोडिन पुगिने भएकाले हामी कर्मचारीहरूको सेवाकालीन र अवकाशप्राप्त पछिको समयमा समेत समुदाय वा समाजसँग नजिकिने र सामाजिक सम्बन्धहरूलाई सुमधुर बनाउने मौका मिल्दछ । त्यसो त किरात राई कर्मचारी मञ्चमा लाग्दा वृत्ति विकासमा पछि परिने भ्रमलाई चिर्न यस संगठनमा लागेका अग्रज किरात राई कर्मचारीलाई हेर्दा नै काफी हुन्छ ।